2Pe 3 | MMX | STEP | Larapen tangas orong tarak. Neni na lovoang sepsev agepura nenia a malagan i rinemi. La keneng atdu buru na luvoang, aga malagan levelinga xusu ri lox aus levendoxoma atnemi la ti lox adoxoma manga nemi mi levelinga i nunuan.

2 Peter 3

Lavapaase Alii At Lovotpot At Leeme Silok

1 Larapen tangas orong tarak. Neni na lovoang sepsev agepura nenia a malagan i rinemi. La keneng atdu buru na luvoang, aga malagan levelinga xusu ri lox aus levendoxoma atnemi la ti lox adoxoma manga nemi mi levelinga i nunuan. 2 A vara i xusu anak lox adoxoma aklen nimi mi levelinga me gano at luvuttadi vapaase alii at ne Moroa la levelinga at Leeme Silok atnedik la Laradi Loklox Arooro; la ni na levelinga, luvuttadi vavang diga paase nemi min.

3 Avot be, minaklen avukar i do, at levenaleng kavaxap teventaba tuvuttadi rongtonga xepe dinaba rupot, la dinaba mumu asu mun levendoxoma xapmek atdi xa. La nedi na luvuttadi, dinaba paase aksaksa rinemi. 4 La dinaba susue sese xeretna, “Neni ga tong li i rinemi do neni nabamlong, do? Ua nga i no? Luvuttemen nema no digara met axap pam, ketla levempanga move ik lok at lengkot atdi, ga ru kaxat ka i at luruntudum li at lavatbung menemen!” 5 Nedi na diba doxoma abulubun i do ganoxa ne Moroa ga rudum li laxalibet mi lavatkangka. Moroa ga tong levelinga mun la laxalibet ga vot la laxangka ga ravasu mun at ladan. 6 La neni vam na ladan, neni ga vee danut la ga sele utut lavatbung menemen gano. 7 Ketla, laxalibet eburu mi laxangka move duk lok mumu asu levelinga at ne Moroa, la duk lox agagas kusu laxao naba sele utut nedu. La nedu dunabak lok se ap mo laaleng limixin ua dixo mumu asu ne Moroa dinaba ru at lavapaase la ne Moroa naba sele utut nedi.

8 Ketla larapen tangas orong tarak, nemen mi guta domampe lara lavanga keretna; Leeme Silok kopmen na ven leges aleng, la legesa abin sangaun kobot (1000) maares do nedu du ruuna levenampoovo vetpes; kopmen, at levereven teren keretna, nedu na, du epovo mun. 9 Leeme Silok kopmen nak lok sila rik lok levempanga neni gara tong li vam i xuren, na ngan tepentaba go dim doma i xuren. Ketla neni ik lox atnaasan nemi, mila neni i xopara i xusu teta na seeve; neni i vara i xusu limixin axap dina leeng basinge laxapmek atnedi.

10 Ketla laaleng at Leeme Silok naba vot ngan laradi xipkip pilo. Ap mo laaleng, laxalibet naba sonao eburu mi leretepaavat lolos, la levempanga axap to vana at lamavangkap naba an la na lok kapmek axap; la lavatkangka eburu mi levempanga dik lok keneng teren naba sonao axap at laxao.

11 Kuren la nemi minaba lok ngan limixin sala rinotno, do minaklen i do na lavatbung menemen naba rem utut keretna? Lorooro axa atnemi na xaala la kopmen taxakapmek noxok lok teren. 12 Ap mo levenaleng mina ngangais mi lomomo ti laaleng at ne Moroa, mina lox alolos mo laaleng kusu na vot soso mun. Ap mo laaleng laxalibet naba an, la na rem utut, la levempanga axap naba releus at liplivi. 13 Ketla nedik ata ngangais mi lomomo ri lempanga ne Moroa ga tong li i rinedik; la neni laxalibet maxat la lavatkangka maxat, la lorooro nunuan ik mokso nabak lok go.

Levempapaase Avit

14 Kuren la, larapen tangas orong tarak, at na nga levenaleng mi ngangais mi lomomo ri mo laaleng, a vara i do, mina tu lolos kusu noxopmen toxot kakapmek kopla toxot ik token nak lok at lorooro atnimi, la minak lox eburu mi ne Moroa keneng at lenmila ren. 15 Mina doxoma avukat do Leeme Silok atnedik i ngangais mi lumulus, kusu limixin dina roo suu; i ngan pam neton orong atnedik ne Pol ga malagan tinemi mi lakleklen at ne Moroa ga raba i min. 16 Neni i paase amisik keneng at lempoang teren mumu na levempanga. Leventaba levempanga lolos mo ik lok keneng at lempoang teren la i lolos kusu ata xasep teren; la limixin dixo tu lolos at lunuunu atnedi, di ba gili xapmek lempasuun ap mo levelinga ren, la di ba gili xapmek bok levelinga xeneng at Lovoang Kaala. Kuren la mumu mun mo langas dik lox i, dinaba seeve.

17 Larapen tangas orong tarak, miraklen pam i do lavaeme loklox ase xaxarang mo naba vot. Kuren la mina lok tatao avukat nimi, kusu mi noxo mu asu laxapmek at limixin dixo mumu asu levelinga at ne Moroa la mina subu bilong basinge lengkot avukat nemi mi tu ren. 18 Ketla minak lox epasum i xusu mina susu xeneng at letaba nabalamu la lakleklen at Leeme Silok atnedik la Laradi Loklox Arooro ne Iesu Karisito. La leemi asu xusuk tin, ningina la amisik! I ruturun.